Blog

Marian Congress Prayer

சென்னை – மயிலை உயர் மறைமாவட்டம்
மரியன்னை மாநாடு 2023
செபம்

இறைவனின் அன்னையே, எம் அனைவரின் தாயே! முதல் மரியன்னை மாநாட்டின் நூற்றாண்டு நினைவையும், பெசன்ட் நகர் அன்னை வேளாங்கண்ணித் திருத்தலத்தின் பொன்விழா ஆண்டையும், கொண்டாடி மகிழும் எம் அனைவருக்கும் உம் பரிந்துரையின் பேறுபலன்களை அருள்மாரியெனப் பொழிந்தருளும்! குறிப்பறிந்து ஓடோடி எலிசெபத்துக்கு உதவினீரே, இன்று எங்களுக்கும் உதவிசெய்ய ஓடோடி வாரும்.

திருமகனின் அன்னையே, இயேசுவின் பணிவாழ்வில் தோழியெனத் தோள்கொடுத்து தோள்கொடுத்து, திருத்தூதரின் சான்றுவாழ்வில் ஊக்கம்தந்து ஒன்றிணைத்தவளே, இந்த எம் மரியன்னை மாநாட்டின் முயற்சிகளில் பொருளுள்ள பயன்களைத் தாரும்.

திருமறையின் அன்னையே, இறைமகனின் பாடுகளில் உடனிருந்து சீடர்களின் சோதனைகளில் தெளிவுதந்து பெந்தகோஸ்தே அனுபவத்தில் கலக்கம் களைந்து தொடக்ககாலத் திருஅவையைத் திடப்படுத்தினீரே, கூட்டொருங்கியக்கப் பாதையில் பயணிக்கும் எம்மவர்க்காய் தொடர்ந்து பரிந்துபேசும் அம்மா!

வேளைநகர் தாயே! சுகம்தரும் அன்னையே! ஆட்டிடையர் சிறுவனுக்கும், கைம்பெண்ணின் முடவனுக்கும், கடலில் தவித்த போர்த்துகீசிய வணிகருக்கும் காட்சிதந்தீரே! வல்லமை மிகுந்த உம் மன்றாட்டை நாடும் உம் பிள்ளைகள் எம்மையும் கனிவோடு கண்ணோக்கும்!

மரியன்னையை உம் இல்லிடமாக்கிய வானகத் தந்தையே, உம் கூட்டொருங்கியக்கப் பாதைகளை எமக்குத் தெளிவாக்கும்! மரியன்னையின் உடலிலும் உள்ளத்திலும் கருவான இயேசுவே, உம் ஆட்சி இத்தரணியில் மலர எம்மை ஆட்படுத்தும்! மரியன்னையை முழுமையாய் ஆட்கொண்ட ஆவியானவரே, இடுக்கமான வாயிலை நோக்கி எம் கால்களை இட்டுச் செல்லும், இறைவனின் அன்னையே, எம் அனைவரின் தாயே, உம் அரவணைப்பில் என்றும் எம்மைவைத்துக் காத்தருளும்! நம்பிக்கையின் பயணத்தில் எம்மோடு கூடவே இருந்து வழிநடத்தியருளும். ஆமென்!